A aula CeMIT de Boiro, situada no Centro Social de Boiro, celebra este mes de marzo dez anos de andaina oficial ofertando formación no eido tecnolóxico para persoas de todas as idades, motivo polo que o Concello fixo balance da importante actividade despregada por este centro local de capacitación tecnolóxica, integrado na Rede CeMIT impulsada por AMTEGA. No mes de abril continúa con formación tanto enliña como presencial.
Nestes 10 anos de traxectoria rexistráronse un total de 2.377 persoas e unhas 8.060 participaron en actividades relacionadas cos 805 cursos formativos propios que se levaron a cabo neste tempo. Na aula leváronse a cabo uns 135 exames certificados ademais de outras actividades externas para as que se empregaron as instalacións.
A aula CeMIT de Boiro ten xa abertas as inscricións para participar nun ciclo de charlas informativas que se van levar a cabo durante o mes de abril. O día 1 de abril, de 10.30 a 11.30 horas será a charla Que é a Administración Electrónica?, o día 19 de 12.00 a 13.00 horas, Compras seguras por Internet; e o 26 de 12.00 a 13.00 horas, Nova tarifa de luz. Coñécea e aforra na túa factura!.
Inscricións e máis información en axentetic@boiro.org, no teléfono 981 84 26 35 ou no móbil 629 769 139.
