Logo da pausa motivada pola pandemia, a Asociación de Amas de Casa de Ribeira vai organizar o domingo 3 de abril a súa tradicional chocolatada. Será un evento de homenaxe ás persoas maiores. Foi presentado nos seus detalles este 25 de marzo pola presidenta da entidade, Puri Cores, acompañada das concelleiras de Servizos Sociais e Cultura do Concello, Ana Barreiro e María Sampedro.
A homenaxe terá lugar ás 17 horas no Restaurante Baiuca de Artes e haberá autobuses a partir das 16.30 horas dende a estación situada xunto ao Mercado Municipal.
A chocolatada estará amenizada pola cantante Mar Davila.
Puri Cores agradeceu a colaboración do Concello e manifestou a súa confianza en ofrecer un día de diversión á xente maior. Segundo dixo, “xa hai 270 persoas apuntadas e previsiblemente o próximo mércores peche o prazo”.
As veciñas e veciños maiores de 65 anos que queiran acudir teñen que retirar os seus convites na sede da Asociación de Amas de Casa en día laboral de 10.30 a 13 horas.
Tanto Ana Barreiro como María Sampedro expresaron o seu desexo de que a actividade sexa “un éxito”, pois, engadiron, “os nosos maiores ben merecen unha xuntanza coma esta despois de todos os sufrimentos motivados polo coronavirus”.
