Escarabote despide o Entroido este sábado cunha gran foliada no Centro Social

O Entroido na nosa comarca está a ter este ano moitas frontes de actividade na nosa comarca que van máis alá das axendas dos Concellos, algunhas tan interesantes como a que propón a Asociación Cultural Pedra da Aroña de Escarabote (Boiro), que vén de comunicarnos que este sábado día 5 de marzo organiza unha foliada para despedir o Entroido. Será no Centro Social de Escarabote a partir das 20 horas. Previamente, a partir das 19.00 horas, haberá unha ruada musical pola vila.

A asociación acompañou a presentación do programa dun convite a participar a quen queira pasalo ben, cantar, bailar ou tocar algún instrumento. Haberá chocolate e doces de balde e contarase coa presenza do Felipiño, de “corpo presente”, para poder despedilo 24 horas antes do seu enterro.