Outes repartíu 500 castiñeiros para prantar nas áreas secundarias de protección dos núcleos rurais

O Concello de Outes repartíu uns 500 exemplares de castiñeiros entre a veciñanza para reforestar as franxas de protección contra os incendios forestais e promover así a plantación de especies autóctonas. Trátase da segunda edición desta iniciativa que comezou en 2021, cando se repartiron 600 exemplares. O goberno outense indicou que nesta edición se priorizaron as peticións de propietarios que non se beneficiaran o ano anterior deste programa.

Segundo indicou o alcalde, Manolo González, o reparto dos castiñeiros “permitirá protexer os núcleos de poboación contra posíbeis incendios forestais mantendo estes terreos limpos e sen especies pirófitas como o eucalipto ou acacias. Desde o goberno local apuntan que este plan permite aumentar o terreo con árbores autóctonas en perto de dúas hectáreas e cren que terá un efecto multiplicador porque outros veciños e veciñas animaranse a replicar esta acción e as persoas que participan do proxecto, seguramente, planten máis árbores das que lle repartiu o concello.

González tamén solicitou máis apoio por parte da Xunta de Galicia para manter limpas as áreas secundarias de protección dos núcleos rurais posto que os concellos “vémonos desbordados na xestión das solicitudes de limpeza aos propietarios das fincas e carentes de medios administrativas e técnicos para levar a cabo accións subsidiarias de limpeza neses terreos”