A rapazada dos colexios O Grupo e Bayón estivo este martes 1 de febreiro no Parque Periurbano de San Roque para levar a cabo a plantación dunha trintena de castiñeiros. Trátase dunha nova actividade educativa do Concello coa que se busca “sensibilizar aos pequenos sobre a importancia do bosque autóctono, o medio ambiente e o respecto natureza” e, tamén, “dinamizar e poñer en valor esta inmensa área verde lindeira coa cidade de Ribeira”.
Os rapaces recibiron unha charla do técnico forestal Emilio Saborido, quen compartiu os seus coñecementos e ampla experiencia coas crianzas alí reunidas. Os trinta castiñeiros plantados foron achegados co patrocinio das empresas Clínica Veterinaria Ribeira, D’Muiño Obrador de Pan e Hola Mobi.
Ata alí achegáronse a tenente de alcalde María Sampedro e a concelleira de Educación Juana Brión, as cales observaron o labor desenvolvido xunto con Suso Bello, quen dende a pasada primavera está a pilotar os traballos para mellorar as prestacións do periurbano e incrementar o seu uso entre a veciñanza.
A plantación deste 1 de febreiro enmárcase no Proxecto Landra para a creación dun souto, coa finalidade de aportar maior diversidade no conxunto de especies vexetais na contorna, maiormente rexenerada con carballos, sobreiras, bidueiros, ameneiros, ou freixos. Desta volta púxose o foco nos castiñeiros, coa intención de “proporcionar saúde ao bosque, aumentar a masa forestal, e proporcionar alimento á fauna do lugar coa intención de atraer novos moradores ao parque”.
