A iniciativa do Concello de Boiro para escoitar de primeira man (in situ) as demandas da veciñanza das parroquias, Un café co alcalde, segue o seu periplo polo termo municipal e segundo informan dende o Consistorio chegará esta semana á parroquia de Bealo (logo da frutífera experiencia levada a cabo os días pasados en Escarabote, coa participación directa do rexedor José Ramón Romero e parque do seu equipo). O encontro coa cidadanía será ás 18.00 horas na Unitaria de Ponte Beluso.
Como dixemos, a última das xuntanzas celebrouse en Escarabote e o obxectivo é “realizalas de xeito mensual nas distintas parroquias do municipio para achegar a Administración local á veciñanza e coñecer as demandas e necesidades comúns das e dos residentes”, sinalou o Concello, engadindo que grazas ás xeiras de traballo de Abanqueiro e Escarabote “puidemos coñecer cales son as demandas das veciñas e veciños”.
Estes encontros veciñais buscan “activar unha ferramenta de participación útil entre a veciñanza e a administración e servir como complemento das xuntanzas que o alcalde mantén de xeito semanal con veciños e veciñas”.
Como dixemos, o seguinte encontro será coa veciñanza de Bealo e celebrarase o vindeiro venres día 18 ás 18.00 horas na Unitaria de Ponte Beluso.
