O Concello de Boiro, ao abeiro do seu programa de xuntanzas veciñais en todas as parroquias destinadas coñecer de primeira man as demandas dos veciños e veciñas (o programa Un café co alcalde), celebrou en no Centro Social unha reunión de traballo, participativa e aberta, co rexedor José Ramón Romero. Participaron tamén os concelleiros do Goberno Luis Ruiz, Raul Treus e Marcos Fajardo.
Unha vintena de veciños e veciñas participaron nesta xornada na que lle trasladaron ao alcalde e concelleiros demandas como a mellora e aumento de beirarrúas, así como da accesibilidade e seguridade na estrada principal. O alcalde adiantou aos asistentes os proxectos nos que, dende o Goberno local, estase a traballar para a parroquia de Lampón e entre os que están o aumento dos espazos de estacionamento, a mellora da iluminación e outras actuacións de pavimentado no núcleo de Escarabote e nas aldeas da parroquia.
Esta iniciativa de participación cidadá busca complementar as xuntanzas individuais que o alcalde mantén cos veciños e veciñas que así o solicitan e coñecer aquelas demandas e necesidades comúns da parroquia e os distintos núcleos de poboación. O alcalde e os concelleiros agradeceron a implicación da veciñanza nestas xuntanzas posto que “son moi beneficiosas para facernos chegar todas aquelas demandas ou necesidades que hai nun lugar determinado de xeito directo”.
