O Rotogal Boiro Voleibol tratará de achegarse á sétima posición na cancha do Teruel

Miguel Álvarez.- Con apenas 48 horas de recuperación despois de visitar onte ao Léleman Valencia, o Rotogal Boiro Voleibol afronta o seu cuarto partido en nove días na Superliga.
Os da Cachada visitan mañá (ás 20.00 horas no Pabellón Los Planos) ao Teruel, o equipo que lles precede na clasificación e que ocupa a sétima praza. Unha vitoria en terras aragonesas metería de cheo aos de Marcelo Benavídez na loita por escalar postos.
O Rotogal Boiro Voleibol contará mañá coa baixa de Mario Iglesias por motivos laborais para afrontar un duelo que fora aprazado hai unhas semanas por casos de COVID-19 no equipo turolense. Os da Cachada deberán mellorar a súa posta en escena con respecto ao partido de onte na cancha do Léleman Valencia para tratar de tombar por primeira vez a un rival que lle superou nos tres enfrontamentos anteriores na Superliga.
O Teruel iniciou o curso como un dos aspirantes ao título. Con todo, a competición afastouno das catro primeiras posicións a pesar de que dispón de xogadores destacados como o oposto Andrés Villena ou o central boirense Pablo Bugallo. O receptor estadounidense Greg Petty e o colocador brasileiro Jukoski son outras dúas das súas pezas importantes.