Miguel Álvarez.- Unha vez máis, ao Rotogal Boiro Voleibol se lle atragoou un quinto set. No encontro ante o Léleman Valencia, aos da Cachada pesoulles a súa mala posta en escena. Cun xogo infestado de erros no arranque, viron como os locais se anotaron os dous primeiros sets. Os de Marcelo Benavídez reaccionaron, mesmo ofreceron unha imaxe notable na cuarta manga, pero quedaron ás portas da remontada (3-2).
Ao Rotogal Boiro Voleibol custoulle chegar ao partido. Un frouxo inicio, con fallos tanto no saque como
na recepción, lastraron aos visitantes. José Carlos Romero tentouno en ataque, pero os seus esforzos
foron insuficientes para evitar que o Léleman Valencia adxudicásese as dúas primeiras mangas (25-
20 e 25-23).
No terceiro parcial, Felipe Benavídez (32 puntos ao final) deu un paso adiante e o Rotogal Boiro Voleibol creceu. Tras un bo inicio e unha melloría na recepción, os da Cachada tomaron a iniciativa. Renan Levandoski tamén puido entrar en xogo e o set caeu ao lado dos visitantes por un axustado 24-26.
No cuarto set, os galegos ofreceron unhas grandes prestacións tanto en defensa como en ataque.
Impulsados polo acerto de Felipe Benavídez e José Carlos Romero, os boirenses elevaron o rendemento no bloqueo e na recepción e desarbolaron a un Léleman Valencia ao que lle empezaron a entrar dúbidas (19-25).
O Léleman Valencia entrou mellor na manga decisiva e, cun 3-0 inaugural ao seu favor, recuperou a tranquilidade. A pesar dos esforzos do Rotogal Boiro Voleibol e á inspiración de Felipe Benavídez, os locais xestionaron a vantaxe ao longo do set e acabaron anotándose un triunfo moi traballado (15-13).
Léleman Valencia, 3: Funes, Potemsky, Monfort, Dangel, Ribas, Amorim e Javier Mengod (líbero). Tamén xogaron Izquierdo, Huerta, Nagiev e De Juan.
Rotogal Boiro Voleibol, 2: Gaby del Carmen, Mario Iglesias, José Carlos Romero, Felipe Benavídez,
Renan Levandoski, Gaspar Bitar e Adrián Alves (líbero). Tamén xogaron Alan Davila, Martín Casais e Ismael Martínez.
Sets: 1-0 (25-20), 2-0 (25-23), 2-1 (24-26), 2-2 (19-25) y 15-13 (3-2).
Árbitros: Hugo Suárez e Rafael González.
Incidencias: Partido disputado no Pavillón Benicalap Sur ante uns 400 espectadores.
