O Consistorio de Ribeira acolleu este 16 de febreiro a recepción oficial da nova colección de pezas que engrosará o patrimonio da Sala Museo Municipal de Ribeira. Trátase dunha vintena de vestimentas e complementos datados maiormente nos albores do século XX que foron cedidos en depósito a esta instalación por Cristina Borrás Paz.
O alcalde Manuel Ruiz agradeceu esta cesión en réxime de comodato e procedente dunha herdanza familiar, a cal axudará a perfilar os contidos da instalación municipal da casa de dona Adela agora que o Concello está traballando nun museo do mar.
Tamén a concelleira de Cultura María Sampedro mostrou o seu agradecemento por esta contribución, que se produce menos dunha semana despois de que outro veciño, Juan Antonio Varela, doase unha maqueta do vapor Santa Isabel.
Os bens están formados por:
• Unha chaquetiña
• Un chaleco de fío
• Un chaleco-mantilla de fío con apliques de acibeche
• Un chaleco de gasa, bordado e con apliques
• Saia de gasa e bordado
• Faldón liso
• Complementos, varios con acibeche
• Complemento encaixe palillado
• Complementos fíos
• Complemente gasa encaixe palillado
• Raso liso
• Plumas naturais
• Bolso téxtil
• Dous peites de carei e calzador
• Unha baqueta para limpar fusís e unha espada de bastón
• Guante de malla metálica
• Mangual
• Dous cadros con retratos fotográficos
• Dúas libretiñas, unha con tapa de carei.
