O ciclo en liña de Historias de ida e Volta documenta o secuestro do transatlántico Santa María

Con motivo de dar conta dos acontecementos que rodearon ao secuestro do transatlántico Santa María, unha acción de loita contra o réximes autoritarios de España e Portugal da que moitos de nós aínda descoñecemos boa parte dos seus detalles, o Consello da Cultura Galega e a Secretaría Xeral de Emigración achegaron na Rede un especial que documenta este episodio anti-fascista da nosa historia recente, protagonizado ademais por tres galegos: o ex-capitán Henrique Galvao, Xosé Velo Mosquera e José Fernando Fernández Vázquez, chamado comandante Sotomayor. O secuestro de Santa María xa se pode coñecer ao detalle a través do ciclo de especiais dixitais Historias de ida e volta, iniciativa do Arquivo do Emigración CCG co apoio da Secretaría Xeral.

Inclúe vinte imaxes e documentos procedentes deste arquivo ofrecen unha nova lectura dun episodio da nosa historia recente que deu a volta ao mundo.

O navío Santa María é a Operación Dulcinea é o nome dunha nova entrega do especial que dá conta dun feito histórico que, segundo informa o CCG, “pretendía chamar a atención sobre as dictaduras ibéricas co secuestro dun trasatlántico”. A historia, que deu lugar a documentais e películas sobre o tema, ofrécese agora a través de vinte imaxes que proceden de fondos e coleccións depositadas no Arquivo da Emigración Galega.

A escolma do material ofrece imaxes do trasatlántico; do folleto co que a navieira, a compañía portuguesa Companhia Colonial de Navegaçao, cubrían a chamada ruta caribeña, con amarres nos portos de Vigo, Lisboa, Madeira, Tenerife, A Guaira en Venezuela, Curaçao, San Xoán de Porto Rico e Miami. No folleto pode verse como ofertaba unhas instalacións modernas e de gran calidade, con capacidade de máis de 1100 pasaxeiros e unha tripulación de 355 persoas para atendelos coa maior eficacia; un billete e unha imaxe da cafetería.

O especial inclúe o Jornal do Santa Maria, publicado pola tripulación do barco para os pasaxeiros da nave co obxectivo de informalos das actividades organizadas para o seu desfrute, ademais de dar consellos de boas maneiras para ter unha boa viaxe e notas de cociña, textos literarios ou noticias de deportes. Neste especial aparece o número redactado polo comando que secuestrou o buque e que se distribuíu aos pasaxeiros o día 24 de febreiro. Nel infórmase sobre as intencións do secuestro e defenden a lexitimidade do secuestro político do buque e da súa loita contra o réxime de Salazar. Para tranquilidade dos pasaxeiros, deixa claro que os que o desexarán poderían desembarcar nun porto neutral sen ningún tipo de dano. No escrito aparece que o comando estaba ao mando do Capitán Henrique Galvâo, como representante do xeneral Humberto Delgado, presidente electo de Portugal, e do DRIL.