O CEP Brea Segade presenta o venres 25 o segundo volume do seu “Cancioneiro escolar urxente”

O venres 25 de febreiro, ás 17.00 horas, presentarase en Taragoña o segundo volume do Cancioneiro escolar urxente coordinado por José Luís do Pico Orjais e elaborado polo alumnado e profesorado do CEP Brea Segade. A presentación levarase a cabo no exterior deste centro educativo.

No acto ademais da presenza do coordinador, contarase con Uxía Bolaño Amigo (doutora en pedagoxía) e Adolfo Muíños Sánchez (alcalde de Rianxo). A presentación acompañarase dunha intervención musical a cargo de profesorado do CEP Brea Segade.

No caso de climatoloxía adversa a presentación realizarase no Auditorio do CEP Brea Segade.

O Cancioneiro é un proxecto escolar de recuperación e posta en valor do patrimonio musical, cultural e lingüístico de Rianxo, que pretende facilitar a súa incorporación como recurso educativo e ferramenta de traballo en diferentes ámbitos, relacionados coa música e a cultura.