O CEIP Plurilingüe de Outes vén de inaugurar os espazos renovados da planta baixa do edificio, co obxectivo de adaptalos ás novas necesidades educativas. A actuación foi financiada polo Concello de Outes cunha achega de 48.300 €, atendendo así ás peticións trasladadas pola comunidade educativa do centro. A obra centrouse na ampliación das aulas con instalación de paneis móbiles, o que os converte en espazos flexibles e adaptables que permitirán o traballo en grupos e albergar propostas para toda a comunidade educativa. Por outra parte realizouse unha humanización destes espazos coa instalación de tarima e os traballos depintura realizados van permitir ao alumnado cambiar a maneira de ver, facer e sentir na escola.
A modificación de espazos abordada correspóndese coa filosofía educativa cara a que está transitando o centro, cun proxecto pedagóxico que coloca ás nenas e nenos no punto de mira, atendendo aos seus intereses e necesidades. Este traballo foi recentemente recoñecido polo Ministerio de Educación co premio do “Concurso Nacional de Buenas Prácticas en centros docentes”. Neste camiño esta intervención dos espazos é unha das pezas clave ao igual que a mellora dos patios grazas ao traballo das familias, e á futura reforma da Biblioteca Escolar que se pretende levar a cabo.
O alcalde, Manolo González, amosouse moi satisfeito co resultado destas actuacións e felicitou á comunidade educativa do CEIP de Outes polo traballo que está a a realizar e polos premios acadados. Tamén lle solicitou á Consellería de Educación unha maior implicación na mellora do centro, “posto que é a Xunta de Galicia á que ten as competencias nesta materia”, indicou. Nese sentido, o mandatario agarda que a Consellería realice canto antes os traballos de mellora do ximnasio do colexio, que se atopa nun mal estado evidente, e que tamén asuma un maior compromiso na mellora do edificio da nova biblioteca proxectada pola dirección do colexio
