O presidente da Real Academia Galega, Víctor F. Freixanes, mantivo este xoves 3 de febreiro unha xuntanza de traballo co alcalde de Rianxo, Adolfo Muíños. O rexedor fíxolle entrega de exemplares da edición facsimilar do poemario Escolanía de melros (1959) do académico correspondente Faustino Rey Romero (1921-1971), editado polo Concello natal do poeta e sacerdote rianxeiro, do que se están celebrar (en Isorna, parroquia á que pertencía, e en todos os ámbitos municipais) os 50 anos do seu pasamento.
Para quen non a coñeza, lembrar que Escolanía de melros é unha obra clave no legado literario de Faustino Rey Romero. A obra saíu do prelo en 1959 con cuberta de Agustín Portela Paz e ex libris de Xosé Conde Corbal. A publicación do Concello de Rianxo realizouse a partir dun dos exemplares editados no seu momento por Gráficas Bolfer do Porriño, con dedicatoria ao tamén relixioso e académico correspondente Xosé Isorna.
A edición está enriquecida con vinte gravados orixinais realizados por quince ilustradores de Rianxo e Padrón para os sonetos do poeta. O labor artístico desenvolveuse no marco dun obradoiro organizado polo Museo do Gravado de Ribeira no Liceo de Rianxo, baixo a dirección de José Fernández Míguez e coa colaboración de Camilo Seira.
Escolanía de Melros é o título dunha colección de sonetos de Rey Romero que está considerada unha peza clave no seu legado poético, publicada en 1959. A obra está na cerna ademais da exposición inaugurada no Auditorio Municipal en xaneiro, unha mostra de gravados que leva o nome do histórico poemario e que se encadra nas actividades organizadas esta tempada polo Concello para honrar a figura de Castelao (Actos Castelao 2022) e, tamén, a de Faustino Rey Romero.
