O Auditorio de Rianxo acolle até o 20 de febreiro unha mostra de gravados que rende tributo aos tesouros literarios locais

Este venres 21 de xaneiro inaugurouse en Rianxo, no Auditorio Municipal, a exposición de gravados Escolanía de Melros, encadrada no programa de actividades organizadas esta tempada polo Concello para honrar a figura de Castelao (Actos Castelao 2022) e, tamén, a de Faustino Rey Romero.

A mostra, que se poderá ver até o 20 de febreiro na sala de exposicións do Auditorio, recolle os traballos realizados ao abeiro do Obradoiro de iniciación ao gravado impartido por Pepe Míguez (en colaboración con Camilo Seira) o pasado mes de outubro. Foi organizado polo Concello de Rianxo e o Museo do Gravado de Artes, en Ribeira. De resultas da dita actividade formativa saíu a exposición que pode verse estes días no Auditorio de Rianxo e, tamén, unha edición facsímil coas creacións que colleron corpo a través do obradoiro.

Como dixemos, baixo o epígrafe Escolanía de Melros réndese tributo tamén a outro ilustre autor rianxeiro: o escritor e sacerdote de Isorna, Faustino Rey Romero. De feito, Escolanía de Melros é o título dunha colección de sonetos de Rey Romero que está considerada unha peza clave no seu legado poético, publicada en 1959.