Na mañá deste luns 21 de febreiro as concelleiras Laura Salgado e Beatriz Rosende presentaron a programación do Entroido 2022 en Noia, unha axenda festiva que achegará actividades entre o venres 25 e o mércores 2 de marzo.
Segundo avanzaron, unha das accións estrela será o concurso de disfraces dos máis cativos, previsto para o sábado 26 e incluíndo un photocall que estará instalado no claustro do Consistorio a disposición de todas as crianzas participantes (que recibirán un agasallo pola súa implicación creativa na festividade do Entroido) en horario de 16.00 a 20.00 horas. As inscricións para o concurso poden facerse xa, a través de eventosconcellonoia@gmail.com, indicando nome e apelidos, enderezo, teléfono, nome do disfrace e categoría na que participa a nena ou neno.
As bases do concurso poden consultarse na web do Concello. No momento da inscrición indicarase a hora á que deben presentarse para facer a foto.
Podemos consultar os detalles da axenda do Entroido na web do Coliseo Noela.
Amais do concurso de disfraces, o programa inclúe actuacións musicais (o venres 25, cunha ruada da Charanga Vila de Noia a partir das 20.00 horas) e obradoiros de Entroido (o luns 28 no Claustro do Concello, entre as 17.30 e as 19.30 horas, e tamén o martes 1 de marzo no mesmo emprazamento e co mesmo horario). A axenda culmina o Mércores de Cinza, co Enterro da Sardiña. A vertente musical virá da man, o mércores, da Charanga Likor-K. A comitiva sairá ás 20.30 horas do Curro, en condución rápida até o Paseo.
