O Consistorio de Ribeira acolleu este venres 4 de febreiro a inauguración dunha destacada mostra sobre peregrinaxes, camiños, experiencias xacobeas e viaxes interiores e exteriores. A exposición A ruta das estrelas, do artista coruñés Mariño de Souza, poderá verse na Casa do Concello até o 30 de abril. A colección está formada por un total de 52 obras procedentes do Museo do Gravado de Artes (Ribeira). Están elaboradas a pluma e tinta chinesa sobre papel ou en serigrafía coa técnica do arco iris sobre cartolina.
No acto inaugural estiveron presentes, entre outros representantes municipais e membros do tecido cultural de Ribeira, o alcalde Manuel Ruiz, a concelleira de Cultura María Sampedro, o director do citado museo Pastor Rodríguez, o párroco Ricardo Villaverde ou o presidente da Asociación de Amigos do Camiño de Santiago A Orixe, Manuel Mariño.
Manuel Ruiz manifestou que a exposición é froito da simbiose entre o Museo do Gravado e o Concello e responde ao ánimo de achegar aos veciños a expresión artística expoñéndoa nun lugar de obrigado paso para moitos ribeirenses como é o consistorio local.
