Miguel Álvarez.- O Rotogal Boiro Voleibol atravesa un momento doce. Na tarde deste 16 de febreiro impúxose por 3-0 ao Conectabalear Manacor nun duelo directo na loita pola sétima praza da Superliga. Os da Cachada non lle deron opción a un conxunto balear que foi superado en pequenos detalles, pero que non arroxou a toalla en ningún momento.
O inicio do encontro foi moi igualado, con ambos os conxuntos loitando punto a punto. Con todo, dúas accións no bloqueo de Renan Levandoski e Gaspar Bitar foron determinantes para que o Rotogal Boiro Voleibol tomase a iniciativa no tramo decisivo do primeiro set. Os de Marcelo Benavídez non perdoaron para asumir a dianteira (25-23).
A segunda manga desenvolveuse de maneira semellante á primeira, aínda que, nesta ocasión foi o Conectabalear Manacor o que marcou o ritmo. No entanto, algún erro en ataque dos visitantes no tramo final do set permitiu aos boirenses remontar e anotarse outro tanto (26-24).
O golpe foi duro para o Conectabalear Manacor, ao que lle custou entrar no terceiro set. O Rotogal Boiro Voleibol empezou moi forte (8-1) e todo indicaba que se podería chegar a un desenlace plácido para os da Cachada. Non foi así. Os mallorquinos foron limando diferenzas e os locais foron, nalgunhas accións, presa dos nervios. Pero, finalmente, pecharon o partido pola vía rápida (25-22).
Rotogal Boiro Voleibol, 3: Gaby del Carmen, Mario Iglesias, José Carlos Romero, Felipe Benavídez, Renan Levandoski, Gaspar Bitar e Adrián Alves (líbero). Tamén xogaron Martín Casais, Alan Davila e Ismael Martínez.
Conectabalear Manacor, 0: Vanole, Víctor Méndez, Barsemian, Caetano Filter, Walter da Cruz, Sergio Ramírez e Piris (líbero).
Sets: 1-0 (25-23), 2-0 (26-24) e 3-0 (25-22).
Árbitros: Diana Rico e Francisco Sabroso.
Incidencias: Partido disputado no Pavillón da Cachada ante uns 300 espectadores.
