CONGALSA colabora co Programa de Xuventude Mentoring

A empresa pobrense CONGALSA, referente galego no ámbito alimentario, confirmou este mes de xaneiro a súa colaboración co Programa de Xuventude Mentoring, un proxecto da Xunta dirixido a captar e estimular novos talentos entre a mocidade acabada de titularse e que se atope na procura dun oco no eido laboral. A empresa da Pobra explica “o Xuventude Mentoring é unha oportunidade para novos profesionais e en CONGALSA gústanos contribuír ao emprego entra a mocidade”. Isto, engaden, forma parte da estratexia de Responsabilidade Social Corporativa (RSC) da empresa.

CONGALSA, a través da súa colaboración no programa, traballará coa Xunta para implementar o plan e achegar o seu coñecemento empresarial nas distintas actividades de asesoramento que se desenvolvan. Este traballo de mentoring levarase a cabo de diferentes xeitos:

-Networking. O networking favorece o contacto entre potenciais candidatos a un posto de traballo e as empresas. Estas reunións, explican fontes de CONGALSA, “son idóneas para cruzar información e, desta forma, aumentar as probabilidades de conseguir emprego”. Nos últimos anos, estas reunións xeneralizáronse como opción de inserción laboral.

-Formación complementaria. A formación complementaria é outra das opcións que se proporcionan. Existen cursos específicos para determinadas empresas ou sectores, o que facilita a inserción laboral. Non en balde, hai algunhas habilidades que só se poden obter co apoio de profesionais. En consecuencia, este é un valor engadido que atopan os candidatos aos postos de traballo.

-Asesoramento profesional. Os candidatos recibirán consellos prácticos, recursos e bagaxe da man dos profesionais. Este asesoramento inclúe un seguimento personalizado para comprobar progresos.