Chega este venres ao Lustres Rivas a mostra que rememora os cen anos da bandeira galega nos edificios oficiais

O Centro Cultural Lustres Rivas vai ser escenario a partir do venres 11 de febreiro dunha nova exposición titulada 1921-2021, 100 anos da bandeira galega no Palacio municipal da Coruña. Trátase dunha mostra organizada pola Deputación na que se reflicte este fito histórico, datado o 25 de xullo de 1921, no que a bandeira de Galicia ondeou por primeira vez na historia nun edificio institucional.

Así, partindo de documentos históricos como a acta municipal na que se aprobaba que a bandeira fose izada no Palacio Municipal o 25 de xullo de 1921, ou recortes da prensa da época, os guionistas e investigadores Manuel López Poy e Manel Cráneo, co asesoramento histórico do historiador Xosé Alfeirán, realizaron para esta mostra un módulo de cómic histórico debuxado por Alberto Taracido e Rubén Rial. Trátase dunha obra de banda deseñada en dous actos que permite aos visitantes entender o nacemento e a evolución da bandeira galega desde finais do s. XIX ata 1921, ano en que se iza por primeira vez nunha institución, o Palacio Municipal da Coruña.

Para completar a proposta expositiva, unha escolma de ilustradores e ilustradoras, principalmente da plataforma Coruña Gráfica, ofrecen a súa homenaxe artística á bandeira. Partindo do símbolo icónico, cada un deles dá a súa visión persoal do mesmo e dos diversos contextos en que se pode atopar, prestando especial atención a algúns elementos propios da identidade galega. Os participantes son: Branda, Uxío Broullón, Aurora Cascudo, Iria do Castelo, Miguel Cuba, Alberto Díaz, Brais Fierro, Héctor Francesch, Alberto Guitián, Uxía Larrosa, Antón Lezcano, Jorge Peral, Perdivel, Xulia Pisón, Javier de la Rosa, Irene Sanjuán, Luis Sendón e Calros Silvar.

Inauguración

O acto inaugural da exposición, que está comisariada por Manel Cráneo e Henrique Torreiro, terá lugar o día 11 ás 21 horas e os asistentes recibirán de balde un catálogo sobre a mostra. Os interesados poden reservar a súa asistencia enviando un correo a culturaefestexos@ribeira.gal ou chamando por teléfono ao 981 835 650.

O horario de visita será de luns a venres de 10 a 14 e de 19 a 21 horas e os sábados de 11 a 14 horas.