Canceladas as funcións do 9 ao 13 de febreiro, ao detectarse casos positivos en covid-19 no equipo do espectáculo.
A devolución do importe das entradas realizarase a través das canles de venda polos que foron adquiridas.
A peste é unha versión teatral de Cándido Pazó, inspirada na obra de Albert Camus, coa que reflexionar sobre o comportamento da sociedade e dos individuos durante situacións de crises.
O evento estaba previsto para este 18 de febreiro no Salón Teatro de Santiago Compostela, ás 20.00. O autocar ía saír da estación de buses, na praza Heroínas de Sálvora, ás 18.00.
A actividade ten un custe de 6 euros e incluirá viaxe de ida e volta e a entrada. Hai un máximo de 50 prazas e é preciso que se anoten un mínimo de 30 persoas para que se leve a cabo. Nesta iniciativa están a participar tamén outros concellos como os devanditos de Rianxo e Boiro e máis o municipio veciño de Vilagarcía, entre outros.
A temporada no Salón Teatro comeza o 20 de xaneiro e rematará o 13 de marzo. Será obrigatorio o uso de máscara durante toda a función e a desinfección de mans tanto á entrada como á saída.
O espectáculo
O equipo de A Peste está dirixido por Cándido Pazó, quen asina tamén a dramaturxia. Inspírase na novela homónima do autor franco-arxelino Albert Camus, na que aborda de xeito metafórico as grandes pragas causadas polo ser humano.
Evaristo Calvo, César Cambeiro, Nacho Castaño, Xurxo Cortázar, Salvador del Río, Casilda García, Paku Granxa, Luís Iglesia, Tone Martínez, Rebeca Montero, Marcos Orsi, Santiago Prego, María Roja, Santiago Romay e Carlos Sante compoñen o elenco que lles dará vida ás personaxes deste clásico.
A peza ofrece unha reflexión sobre o comportamento da sociedade e dos individuos durante situacións de crise. A través do personaxe do doutor Rieux, narra os sucesos na cidade de Orán durante unha praga de peste que a asedia e pon os seus habitantes en corentena. Céntrase nos periplos das persoas encerradas, en como loitan contra a praga e lle buscan un sentido á súa situación, primeiro nunha loita egoísta pola supervivencia, logo a través do esforzo colectivo e comunitario.