Esta mañá o presidente da Mancomunidade de Municipios Barbanza Arousa, Xosé Lois Piñeiro, e Santiago García, representante da Asociación Cultural Alberto Romero asinaron un convenio de colaboración co fin de colaborar, impulsar, difundir e promocionar as actividades creadas pola Asociación Cultural Alberto Romero.
A Asociación Cultural Alberto Romero ten como fin principal a promoción da cultura audiovisual a través do seu Certame de Curtas que celebra este ano a súa 6ª edición nos Concellos de Barbanza Arousa e que conta con moi boa acollida entre o público en xeral.
Dende Barbanza Arousa comprométense con este convenio a colaborar na realización do proxecto VI Certame Audiovisual Alberto Romero de curtas no que participan nenas/os desde primaria ata rapazas/es de Bacharelato, ademais de contar cunha categoría para usuarias/os dos Centros de Diversidade Funcional e outra categoría libre aberta a todos aqueles que queiran participar. Este Certame terá lugar este sábado 19 de febreiro no teatro Elma na Pobra do Caramiñal e contará con 4 premios nas diferentes categorías, de 300 euros cada un.
De forma paralela ao certame realízanse formacións anuais nos catro concellos de como realizar unha curtametraxe.
Con este acordo, a entidade supramunicipal, continua co seu plan de traballo no que é importante contar con profesionais, entidades e asociacións culturais que traballan xa no territorio, apostando así por unha implicación de proxectos culturais cos que consolidar unha proposta de turismo creativo.
