A mostra Noir Blanc do noiés Veiras Manteiga recala este venres en Lousame

A alcaldesa de Lousame, Teresa Villaverde Pais, e o artista noiés Xosé Luís Veiras Manteiga, inaugurarán a exposición Noir Blanc este venres 18 de febreiro, ás 20:00 horas, na Casa da Cultura local. O acto contará coa intervención do Pastor Rodríguez Santamaría, director do Museo do Gravado de Artes (Ribeira), así como unha apertura e peche musical a cargo de Fernando Froján.

Noir Blanc é unha colección de 27 traballos en tinta e acrílico sobre papel realizados a inicios dos anos 90 por Veiras Manteiga. A diferenza dos seus traballos máis actuais, na actual proposta artística desaparecen as cores, as figuras e as paisaxes tradicionais neste pintor. Unhas características que desaparecen e son substituídas por un negro sobre branco, tal e como alude o título da mostra.