A axenda de espectáculos de Boiro para o que resta de febreiro será completa, diversa, controlada e, sobre todo, enriquecedora e creativa. Foi dada a coñecer este 9 de febreiro pola edil María Outeiral, quen engadiu outro punto en común das actividades do programa: enmárcanse, en maior ou menor medida, na celebración do Día de Rosalía, que se conmemora o 23 de febreiro.
No marco das actividades máis especificamente encamiñadas a celebrar o Día de Rosalía o persoal do departamento de Cultura elaborou un vídeo para difundir nas redes sociais coa lectura de poemas da autora.
Os días 22 e 23 de febreiro haberá teatro na Casa da Cultura para o alumando dos centros de ensino do municipio. O día 22 será a quenda do espectáculo Buscando a Rosalía de Raquel Queizás, para nenos e nenas de 5 e 6 anos; e o día 23 representarase A viaxe de Rosalía de Teatro Babaluba para nenos e nenas de 7 e 8 anos.
O día 23 de febreiro ás 20.30 horas no Centro Social de Boiro haberá unha mesa redonda coas autoras locais Charo Lópes e Natalia Carou sobre a autora de Cantares gallegos e a súa propia experiencia narrativa. Xunto coa Fundación Rosalía vaise organizar tamén a presentación da publicación Follas Novas, un volume que se publica anualmente adicado de xeito íntegro á autora, e tamén a plantación dunha figueira da horta de Rosalía. Amais, farase unha visita dende Boiro á que foi a súa residencia en Padrón e que hoxe funciona como museo e punto de información principal sobre o seu legado.
Ademais, o Concello de Boiro conta con actividades culturais para todo o mes de febreiro con representacións teatrais e obradoiros para nenos e nenas.
Ademais celébranse as seguintes actividades:
• Venres 11 de febrero, 18.30h – Biblioteca Municipal de Boiro. Actividade para menos/as Divirte-T.
• Venres 11 de febreiro, 20.00h – Casa da Cultura. Martín Camiña Feixes de ilusións.
• Venres 18 de febreiro, 20.00h – Casa da Cultura. Malasombra producións Os fabulosos cleaners.
• Sábado 19 de febreiro, 11.30h – Biblioteca Municipal de Boiro. Contacontos Deixame que che conte.
• Venres 25 de febreiro, 20.30 horas. Presentación do Premio Nacional de Narrativa Virtudes e Misterios de Xesús Fraga.
• Venres 25 de febreiro, 18.30h – Biblioteca Municipal de Boiro. Actividade para nenos e nenas Divirte-T.
