Un operario foi trasladado polos servizos sanitarios de urxencia ata o centro hospitalario de referencia despois de caerlle enriba un muro mentres traballaba nunha gabia da rúa Cruceiro, no concello coruñés de Boiro.
O 112 Galicia tivo constancia dos feitos ao recibir a chamada de alerta dunha persoa particular ás catro desta tarde. Durante a comunicación, o alertante solicitaba asistencia médica urxente para un traballador que quedou atrapado debaixo dun muro.
De inmediato, os xestores do 112 puxeron a situación en coñecemento dos profesionais de Urxencias Sanitarias de Galicia-061 e dos Bombeiros de Boiro. Ademais, os Bombeiros de Ribeira foron informados do sucedido por se fose precisa a súa intervención.
Finalmente, os efectivos do Servizo de Prevención Extinción de Incendios e Salvamento confirmaron que o operario estaba liberado pero, aínda así, tiveron que intervir para axudar ao ferido. Así, o traballador foi evacuado en ambulancia ata o centro hospitalario.
Para prestar apoio aos servizos de emerxencia, avisouse tamén aos axentes da Garda Civil, da Policía Local e á Protección Civil da localidade.
