O delegado da Xunta na Coruña, Gonzalo Trenor, participou na mañá deste venres 21 de xaneiro O Camiño Marítimo da ría Muros-Noia, dentro das presentacións da programación de Galicia, que se levaron a cabo na 42 edición de FITUR, a Feira Internacional de Turismo que se celebra en Madrid.
O delegado territorial destacou que “a nosa comunidade recibiu 3,5 millóns de viaxeiros que fixeron case 8 millóns de noites e certificáronse preto de 180.000 compostelas. Estas cifras representan un 20% máis das compostelas que inicialmente estaban previstas”. Trenor subliñou que “superamos en 25 puntos o nivel medio de recuperación da demanda turística no conxunto do Estado en 2021”.
O representante do Goberno autonómico apuntou que “a mellor definición do xeodestino ría Muros-Noia sería unha Galicia en pequeno dentro dunha Galicia máis grande, porque este espazo ten todo para extractar nunha soa viaxe a esencia da nosa comunidade”, por exemplo praias espectaculares, paisaxes únicas, unha gran riqueza histórica chea de cultura e tradicións e unha excelente gastronomía. Todo isto, dixo, “fai que cada ano sexan máis os turistas que se animan a descubrir este espazo do sur da nosa provincia”.
Ademais, puxo en valor “a unidade dos concellos de Serra de Outes, Lousame, Porto do Son, Noia e Muros para acadar obxectivos comúns como a promoción turística”. “Sodes un exemplo a seguir”, afirmou.
Trenor rematou a súa intervención subliñando que “a colaboración entre administracións e o sector turístico sitúanos no camiño correcto para fortalecer a marca turística do Barbanza como unha parte esencial da marca Destino Galicia e froito dese esforzo a demanda turística deste territorio crece cada ano”. Ademais, apuntou que “para lograr este obxectivo o xeodestino da ría Muros-Noia conta coa Xunta de Galicia”.
