“Sélo e parecelo”. Antón Luaces

De “activista antipesqueiro” cualifican ao comisario de Pesca, Océanos e Medio Ambente, Virginijus Sinkevicius, os integrantes da Federación Andaluza de Asociacións Pesqueiras (FAAPE) polo seu posicionamento público contrario á pesca de arrastre.
Nun escrito remitido ao máximo representante pesqueiro da UE,  a citada Federación súmase á denuncia que, días antes, presentara a organización pesqueira internacional Europêche que preside o andaluz Javier Garat, após a participación de Sinkevicius nun acto organizado (como xa se informou aquí) por unha organización non  gobernamental na que se solicitada a eliminación da pesca de arrastre, actividade que a FAAPE lembra “é legal e cumpre coa normativa”. Igualmente traslada ao comisario que a pesca de arrastre “mantén o mercado actual do peixe fresco nas comunidades costeiras, un terzo de buques europeos e un terzo do volume de especies pesqueiras”. Denuncia amáis a Federación  a intención da Comisión de eliminar esta tradicional actividade económica e os postos de traballo no Mediterráneo subliñando que as decisións e actuacións do comisario “son proba delo”.

No escrito, a FAAPE salienta que “desde o sector pesqueiro que vostede NON representa, e como ven de confirmar cos seus actos públicos recentes, debemos expresarlle a nosa reprobación”, engadindo que “a única competencia en política pesqueira europea ven encabezada por vostede, un activista antipesqueiro sen pudor de amosar en público o seu desexo de destruir a pesca de arrastre e a cultura mediterránea”. Lembran a Sinkevicius que, amáis de comisario de Océanos e Medio Ambente, é tamén comisario de Pesca, polo que “como dí a frase romana, a muller do César amáis de selo debe parecelo” e vostede niso non cumpre”.

Unha dura mensaxe pecha o comunicado da federación andaluza: “Vostede pasará sen pena nen groria como comisario nuns anos; seguramente agárdalle dempois un alto cargo nalgunha fundación ecoloxista ou medioambientalista, como á súa predecesora Damanakis. Esas portas xiratorias tan ben postas en Bruxelas.. Pero nós, os pescadores, seguiremos a aportar á sociedade ese produto saudable tan necesario: o peixe e o marisco de fondo, capturado con pesca de arrastre. Así que non nos poderá destruir malia os seus desexos”. Tamén en Galicia, a Fundación Rendemento Económico Mínimo Sostible e Social (FREMSS) criticou, a través de Torcuato Teixeira Valoria a actuación do comisario europeo de Pesca, que non consideran axeitada ao cargo e, moito menos, responsable dadas as peculiaridades da pesca de arrastre e o labor que esta desenvolve nos mares comunitarios.

Certamente, semella que nos últimos tempos os designados para desempeñar funcións de responsabilidade en materia de pesca no seo da UE, non chegan a entender e asumir que a Comisión de Pesca non é unha ONG nen debe exercer coma un lobby pesqueiro, o que non quere dicir, obviamente, que deba defender sen nengún tipo de reservas os plans das empresas pesqueiras. Pero deberían esforzarse en entender o papel das diversas artes de pesca imperantes en Europa e entender o que estas significan non só para as empresas da pesca senon tamén para a sociedade e comprender esa economía social non sempre ben entendida e en demasiadas ocasións criticada (a veces sen fundamento).