A conselleira do Mar, Rosa Quintana, estivo na mañá deste luns 3 de xaneiro en Porto do Son, visitando o porto da vila, onde a Xunta está a ultimar os traballos de remodelación integral da contorna co obxectivo de “favorecer a integración do peirao na vila facilitando o labor dos usuarios e facendo a zona máis atractiva para os veciños e visitantes”, explicou, engadindo que as obras de Portos de Galicia supoñen un investimento de catro millóns de euros.
A titular de Mar, que estivo acompañada pola presidenta de Portos de Galicia, Susana Lenguas, fixo saber que as actuacións atópanse neste intre “na súa fase final” e que “afectan a unha superficie total de 26.000 metros cadrados ao longo de toda a franxa marítima da localidade”.
O obxectivo principal, engadiu, é “humanizar o bordo portuario e abrir o concello ao mar, de xeito que se habiliten amplas zonas para o desfrute dos veciños ao tempo que se facilita o traballo dos usuarios do porto”.
Quintana debullou máis polo miúdo a natureza dos traballos desenvolvidos, e dixo que estes inclúen “a creación de varias zonas de integración porto-cidade, a reorganización do viario -cun novo trazado e novos materiais de execución- e a creación dun edificio de servizos náuticos e portuarios nas inmediacións do dique, ao que cómpre engadir, no capítulo de humanización, a actual realización de actuacións ornamentais como a plantación de árbores”.
A conselleira do Mar destacou que “a remodelación do bordo portuario supón un cambio moi importante no aspecto da localidade pois todas as rúas que cruzan a vila cara ao porto remataranse en pavimento de pedra integrándoas co propio espazo portuario, engadíndose unha rotonda elevada en pedra á que se trasladará o emblemático hórreo de Porto do Son”.
Rosa Quintana salientou que as obras manterán a “esencia de Porto do Son” ao conservar os sinais patrimoniais e de identidade ao tempo que se converterá nunha vila máis humana e accesíbel.
A titular de Mar lembrou ademais que os traballos no bordo portuario desta localidade coruñesa buscan tamén contribuír a xerar emprego e riqueza na súa contorna pois permiten mellorar os servizos aos usuarios e incrementan o interese e o atractivo turístico de Porto do Son.