Barbanza pechou o ano 2021 cun milleiro de persoas menos en situación de desemprego que hai un ano.
Os datos facilitados pola Consellería de Emprego e Igualdade confirmaron que no que respecta a Barbanza, o pasado ano pechouse con 5.477 parados, mentres que o 2020 fíxoo con 6.570, p que supón preto de 1.100 parados menos.
A caída na cifra de desempregados foi xeneralizada e a máis acusada produciuse en Ribeira, con 248 menos. Tamén en Noia a diferenza superou os douscentos (203) e en municipios como Rianxo, A Pobra e Muros estivo en torno ao centenar, en Boiro había 1.179 veciños sen traballo ao finalizar o 2020 e este pasado ano foron 954.
Na comparación intermensual, decembro sae perdendo con respecto a novembro, xa que no penúltimo mes do 2021 o número de parados era de 5.243 (363 menos), aínda que debido aos ciclos de actividade de empresas importantes na comarca, que moven un gran volume de traballadores, non é estraño que o dato aumente neste período do ano, a propósito de que, previsiblemente, volverá diminuír cando se publiquen os datos relativos ao mes de xaneiro.
O sector servizos é o que aglutina á maioría de desempregados en Barbanza. As 3.764 persoas sen traballo ligadas a esta actividade económica supoñen un 67 % do total, algo habitual en pandemia, xa que é a máis afectada polas restricións que impoñen as autoridades para tentar conter a transmisión do virus. Na lista séguenlle a industria, con 808 desempregados; a construción, con 434; agricultura e pesca, con 265, e sen emprego anterior, que supoñen 335 barbanceses.
Un dos aspectos que non cambian é a maior porcentaxe de paro feminino. De feito, practicamente seis de cada dez veciños que están á espera de acceder ao mercado laboral son mulleres, un total de 3.355 na comarca.
DATOS DECEMBRO 2021: Ribeira hai 1.439 parados; Boiro, 954; Rianxo, 622; Noia, 621; A Pobra, 467; Muros, 414; Porto do Son, 379; Outes, 245; Lousame, 136 e Carnota, 200.
