Miguel Álvarez.- O nutricionista Eloy Figueira Rial, fundador da iniciativa Sana El Hoy, e membros do primeiro equipo do Rotogal Boiro Voleibol visitaron esta semana o CEIP Praia Xardín, o CEIP Plurilingüe de Abanqueiro e o CEIP Santa María do Castro. Nestes centros falaron sobre a importancia de alimentarse de maneira sa.
O nutricionista estivo acompañado o mércores polo adestrador Marcelo Benavídez no CEIP Praia Xardín de Boiro; o xoves por Marcelo Benavídez, Felipe Benavídez e Renan Levandoski no CEIP Pluriligüe de Abanqueiro; e o venres por Jose García e Marcelo Benavídez no CEIP Santa María do Castro de Cabo de Cruz.
O proxecto Sana El Hoy está dirixido fundamentalmente aos escolares de Primaria, xa que esa é a franxa de idade na que resulta máis sinxelo crear uns hábitos que poidan implantarse e seguirse durante toda a vida. Os obxectivos desta iniciativa son comprometer aos alumnos coa saúde e fomentar unha alimentación saudábel e sustentábel tanto coas persoas como co planeta.
Tamén pretende promover a autonomía alimentaria desde a idade escolar, pór en valor os produtos de proximidade e corrixir a tendencia ascendente da obesidade.
