Os xogadores do Boiro Voleibol promoven hábitos alimentarios saudábeis en Padrón

Miguel Álvarez.- O nutricionista Eloy Figueira Rial, fundador de Sana El Hoy; acompañado por Marcelo
Benavídez e Ismael Martínez, adestrador e xogador do Rotogal Boiro Voleibol, respectivamente; acudiron este mércores 26 de xaneiro ao CEIP Flavia de Padrón para falar sobre a importancia de implantar uns hábitos alimenticios saudábeis.

Durante a visita, os alumnos puideron practicar voleibol xunto aos dous integrantes do equipo que milita na Superliga Masculina, a máxima categoría de ámbito nacional.

O proxecto Sana El Hoy está dirixido fundamentalmente aos escolares de Primaria, xa que esa é a franxa de idade na que resulta máis sinxelo crear uns hábitos que poidan implantarse e seguirse durante toda a vida. Os obxectivos desta iniciativa son comprometer aos alumnos coa saúde e fomentar unha alimentación saudábel e sustentábel tanto coas persoas como co planeta.

Tamén pretende promover a autonomía alimentaria desde a idade escolar, pór en valor os produtos de proximidade e corrixir a tendencia ascendente da obesidade.

Sana El Hoy e Boiro Voleibol visitan este xoves 27 o Colexio Público de Santa Baia de Boiro.