O Concello de Boiro informou de que xa está a disposición do alumnado o comedor do CEIP Santa Baia, nas propias instalacións do centro ensino. Segundo o Concello, a posta en marcha deste servizo viña sendo “unha actuación moi demandada pola comunidade educativa e os escolares”.
Finalmente converteuse en realidade grazas ao traballo conxunto do Goberno local (achegando o mobiliario preciso para a posta en marcha do comedor) e máis a Consellería de Cultura e Educación (levando a cabo as obras de ampliación no centro).
O alcalde, José Ramón Romero, e a concelleira de Educación, María Outeiral, visitaron este martes 25 de xaneiro as instalacións para coñecer o resultado da actuación. “Esta obra era unha demanda de toda a comunidade educativa e que se puido levar a cabo mediante a colaboración das dúas administracións”, afirmou a concelleira María Outeiral.
Durante os dous últimos anos o Concello de Boiro subvencionou o transporte para o alumnado que se tiña que desprazar a diario ás instalacións do restaurante Chicolino ao non dispoñer de prazas suficientes no centro para todos os nenos e nenas que precisan dispoñer deste servizo.
