O Concello de Noia, a través do concelleiro de Cultura, Pepe Pérez, manifestou a súa firme intención de acadar para este ano que comeza a instalación dun ascensor na Biblioteca Municipal que solucione o principal problema de accesibilidade deste céntrico inmóbel.
Segundo fixo saber, este investimento engadiríase aos realizados nestes últimos anos para mellorar o servizo da Biblioteca, como o incremento do material dispoñíbel para os usuarios (700 volumes anuais), o aumento de número de horas semanais da apertura ou a dixitalización dos libros en préstamo.
A isto súmanselle os traballos para optimizar a climatización e o arranxo do lucernario levados a cabo na Casa da Cultura local, inmóbel onde tamén se atopa a Biblioteca.
Segundo fixo saber o edil, o proxecto para instalar o ascensor xa foi redactado polo arquitecto Iván Camba. Tamén dixo que se están a xestionar os permisos precisos coa Fundación Blanco Romero Monroy, propietaria do edificio.
