O Concello de Boiro está a impulsar a recuperación de árbores autóctonas con vistas a blindar os bosques locais e os núcleos de poboación dos estragos dos incendios forestais (tirando proveito das especies galegas a xeito de cortalumes ou devasas). Esta liña de traballo vén da man do Departamento de Medio Ambiente, que anunciou o financiamento da plantación de especies autóctonas nas franxas secundarias.
Así, o Concello repartirá de xeito gratuíto a todos aqueles propietarios e propietarias que o soliciten árbores autóctonas frondosas para repoboar as ditas franxas, entre as que se atoparán castiñeiros, carballos, loureiros ou sobreiras. Neste senso, dende o Consistorio informan de que “a lei obriga ás persoas propietarias destas fincas a telas limpas nunha franxa de cincuenta metros”. E engade o concelleiro Raúl Treus: “Estamos atopando que moitos propietarios non manteñen limpas as fincas polo que se xera maleza que dificulta as tarefas de protección e coidado dos incendios forestais”.
O concelleiro de Medio Ambiente tamén fai saber que “con esta iniciativa o que se busca é repoboar as fincas situadas nas franxas de protección para que se atopen nas mellores condicións e potenciar a protección contra os incendios”.
As persoas propietarias de parcelas situadas nas franxas secundarias interesadas en participar neste programa teñen que mostrar o seu compromiso de adhesión no departamento de Medio Ambiente do Concello de Boiro para formar parte da lista de agarda. A inscrición pode facerse de xeito presencial, a través do enderezo electrónico medioambiente@boiro.org ou o teléfono 981 37 75 85.
