Novo vertido incontrolado na comarca, desta volta nos montes de Dodro

Malia os esforzos das administracións por fomentar hábitos sustentábeis entre a veciñanza á hora de desfacerse dos seus refugallos, segue a haber unha porcentaxe, pequena pero moi prexudicial, de xente que prefire facer ás cousas ao seu xeito e manter viva a práctica de usar o monte (que deben considerar da súa propiedade exclusiva) para desfacerse do que lle sobra. O Concello de Dodro vén de compartir un exemplo desta práctica, cun novo vertido de obras ou reformas que rematou no medio natural.

Este novo exemplo de incivismo choca de cheo co importante traballo despregado polo Concello para axudar á veciñanza a dar tratamento axeitado aos seus enseres sobrantes, por exemplo a través dun Punto Limpo Móbil que xa está plenamente operativo dando servizo polas diferentes parroquias. O Concello engade que a maiores Dodro conta con servizo de recollida a domicilio de refugallos voluminosos ou contaminantes.