O Concello de Dodro confirmou que xa está operativo o punto limpo móbil, destinado a favorecer a recollida de refugallos voluminosos ou perigosos no termo municipal e, tamén, a facilitar ao máximo o transporte dos mesmos por parte da veciñanza das parroquias. A actividade da unidade de recollida de refugallos comezou en Lestrobe, este 7 de xaneiro, prolongándose a súa estadía na localidade por unha semana. O obxectivo do mesmo é permitir que as persoas que residen no termo municipal “conten cun servizo municipal máis para facilitar o labor de separación e posterior reciclaxe de residuos”.
Trátase dun dispositivo móbil composto por un contedor de gran volume, con oito compartimentos para o depósito separado de tubos fluorescentes, lámpadas, pilas e baterías, latas contaminadas e aerosois, cartuchos de tinta baleiros, aceite de cociña usado, pequenos electrodomésticos e elementos electrónicos, de informática e teléfonos móbiles.
A seguinte parada do dispositivo, logo da súa estadía en Lestrobe, serán, nesta orde, o Polideportivo Municipal e o Campo de Fútbol situado en Chenlo. A seguinte localización será en Traxeito, e a esta seguirán: Imo, Bexo e Teaio.
En todos os casos, o punto limpo móbil ficará instalado durante unha semana en cada localización. Esta sinalarase cun panel informativo e previamente será anunciada a través das vías de comunicación habituais do concello, tales como a páxina web e as redes socias.
