Miguel Álvarez.- Martín Casais, receptor de 16 anos e 1,96 metros de altura, regresou ao Boiro Voleibol. O xogador, que até agora permanecía na concentración permanente da Federación Española en Palencia, incorporouse á dinámica do primeiro equipo do club da Cachada.
Martín Casais, nacido o 31 de marzo de 2005, proclamouse campión de España en categorías cadete (2019) e xuvenil (2021) co Boiro. Xa foi internacional en categorías U-17 e U-19, ademais de ser un habitual nas seleccións galegas de categorías de base. Esta tempada vestira a camiseta do Palencia na Superliga 2.
Por outra banda, o Rotogal Boiro Voleibol segue traballando para regresar á competición. O partido desta fin de semana na cancha do Teruel foi aprazado e, en principio, o equipo volverá disputar un encontro da Superliga o sábado 29 contra o Conectabalear Manacor na Cachada.
