María Rivas responde ás queixas pola escaseza de axentes da Policía Nacional en Ribeira

A subdelegada do Goberno na Coruña, María Rivas, emitiu este 20 de xaneiro unhas declaracións que responden ás críticas achegadas por diversos sectores de Ribeira a respecto da inseguridade que se vive na cidade (en parte motivada pola escaseza de axentes), sectores entre os que se atopaba a Asociación de Empresarios de Ribeira, tal e como reflectimos dende este medio. No seu comunicado, a subdelegada salienta “a excelente colaboración entre a Policía Nacional e a Policía Local de Ribeira para garantir que é un municipio seguro”. Amais dixo que o concello “mantén a súa taxa de criminalidade por baixo da media de España, que á súa vez é un dos estados máis seguros de Europa”.

Nunha carta remitida (precisamente) á Asociación de Empresarios de Ribeira, a subdelegada respondeu ás súas consultas sobre a situación da localidade. María Rivas destacou que “a seguridade é unha prioridade para o Goberno, que no caso de Ribeira viuse reflectida na nova comisaría, cun investimento superior aos dous millóns e medio de euros”. Trátase, engadiu, “dunha comisaría moderna, referente e modelo a nivel estatal”. Tamén fixo saber que o obxectivo principal do Goberno é “a satisfacción nos servizos prestados ás cidadás e cidadáns”, para o que ademais de contar con novas instalacións como o caso de Ribeira, “o Executivo impulsa a convocatoria de máis prazas nas Forzas e Corpos de Seguridade do Estado, cunhas 7.300 durante os últimos tres anos na Policía Nacional”, engadiu.

Na carta lembrou “o importante déficit de prazas nos persoais que se atopou o actual Goberno cando tomou posesión”, pero engadiu que “buscamos recuperar eses postos de traballo con convocatorias amplas e unha taxa de reposición superior ao 100%”.

E concluíu: “Ribeira é unha localidade segura que está nun dos estados máis seguros de Europa. En toda Galicia, como tamén en Ribeira, as taxas e os indicadores sobre delincuencia están moi por baixo da media estatal. Isto é grazas ao bo traballo das nosas Forzas e Corpos de Seguridade do Estado e tamén grazas ao comportamento da nosa sociedade. Unha cidadanía cívica e comprometida que neste momento xa pode contar cunha nova Comisaría de Policía referente en todo o país”.

Instalacións da nova Comisaría da Policía Nacional na contorna de Fontán, en Ribeira