O Concello de Ribeira vén de sacar a licitación o proxecto de pavimentado e renovación da auga para consumo e pluviais na rúa Luís Pimentel en Aguiño.
Conforme ao proxecto técnico elaborado, o que se prevé é substituír os actuais servizos de auga potábel e pluviais por outros novos, utilizando por unha parte unha tubaxe de polietileno de alta densidade de 90 milímetros de diámetro e por outra un colector de PVC de 315.
Ademais, toda a calzada será pavimentada cunha mestura bituminosa en quente e o pavimento de beirarrúas e bordos que resulten afectados polas canalizacións serán repostos.
Esta iniciativa supón un investimento de 98.489,96 euros, IVE incluído, e está adscrita ao POS+2021. O prazo de duración das obras é de catro meses.
As empresas interesadas dispoñen ata o 14 de febreiro á medianoite para presentar as súas ofertas a través do Sistema de Licitación Electrónica da Xunta de Galicia.
