Licitada en Ribeira a instalación dunha rede de pluviais na rúa Sidreiras e a súa transversal

O Concello de Ribeira licitou unha nova actuación consistente na instalación dunha rede de pluviais na rúa Sidreiras e a súa vía transversal. Segundo informou o equipo de Goberno local, a día de hoxe cada vez que chove con certa intensidade discorre pola dita vía gran cantidade de auga que dificulta o tránsito e afecta ás vivendas próximas. Para solucionar este problema “proxectouse a instalación dunha liña de pluviais que recolla as augas superficiais e as conduza mediante dúas tubaxes cara un rego existente e cara a rede xeral situada na avenida da Coruña”, informou o Concello.

Respecto dos traballos específicos a despregar, nun primeiro ramal que descorre pola rúa Sidreiras e a súa transversal instalarase unha tubaxe de polipropileno de 80 centímetros de diámetro, en tanto que nun segundo ramal da rúa Sidreiras colocarase outro de PVC de 40 centímetros de diámetro.

A actuación ten un prezo de licitación de 100.284,34 euros, IVE incluído, e un prazo de execución de dous meses.

As empresas interesadas dispoñen ata o 14 de febreiro á medianoite para formular as súas ofertas a través do Sistema de licitación electrónica da Xunta de Galicia.