A Xunta eliminou un punto de vertido de augas residuais na praia de San Francisco, no concello de Muros.
Os técnicos do Plan de Control de Vertidos, dependentes de Augas de Galicia, iniciaron as inspeccións tras a recepción dunha alerta notificada por unha incidencia remitida pola Consellería de Sanidade.
O persoal autonómico localizou a orixe do foco no areal nunha vivenda unifamiliar no lugar de San Francisco, na parroquia de Louro, que desaugaba cara a rede de pluviais que acadaba a ría de Muros e Noia.
Augas de Galicia informou ao Concello de Muros da situación, que requiriu ao responsable do inmoble particular a realización das actuacións oportunas para a emenda dos aportes contaminantes.
Nunha recente inspección, os técnicos de Augas de Galicia verificaron a eliminación deste punto de vertido, grazas á execución da conexión do inmoble á rede de sumidoiros municipal.
