As cámaras de cinema volven cada pouco a Corrubedo, mentres aínda temos no recordo o bo uso que fixo o director e escritor Antón Dobao dos escenarios paisaxísticos que ofrece a vila para a súa película Simbad, rodada tamén no casco antigo de Palmeira. Estes días regresaron as cámaras a Corrubedo con motivo da rodaxe de Sica, longametraxe galego-catalá escrita e dirixida por Carla Subirana e producida por Alba Sotorra, de Miramemira, responsábel de éxitos cinematográficos recentes como O que arde (Oliver Laxe).
O filme ponnos na pel dunha moza, Sica (Thais García), que agarda que o mar lle devolva o cadáver do seu pai mariñeiro. Faino na compaña do seu amigo Suso, cuxa única teima é a inminente chegada da galerna Ofelia. A longametraxe estase a rodar principalmente nos concellos da Costa da Morte (Malpica, Laxe, Ponteceso), onde Sica, coas súas pescudas, descubre un día que o seu tanto o seu pai, como a comunidade de veciños onde reside, non son como ela que pensaban que ela. A estadía do equipo de rodaxe en Corrubedo está previsto que se estenda a semana vindeira, logo de filmarse varias escenas nun inmóbel da vila.
