O vindeiro 16 de xaneiro A Pobra do Caramiñal dará acollida ao XXXIII Campionato Xunta de Galicia Absoluto Masculino e Feminino de Marcha en Ruta, organizado pola Federación Galega de Atletismo (FGA), co patrocinio do Concello e a colaboración da Asociación de Atletismo e Deportes do Barbanza. Os detalles do evento foron dados a coñecer este 11 de xaneiro pola concelleira dos Deportes, Genoveva Hermo (Nós Pobra), o responsábel do sector de marcha en ruta da Federación Galega de Atletismo, Carlos Morales, e o presidente da Asociación de Atletismo e Deportes do Barbanza, José Moure.
No acto de presentación houbo palabras de agradecemento para as tres partes implicadas por facer posíbel que o municipio acolla por quinto ano esta competición. A edil manifestou que “esperamos que sexa da mesma calidade como vén sucedendo nas edicións pasadas, que espertou un gran interese”.
Carlos Morales salientou o alto nivel de participación e destacou algúns dos/as atletas que poden acadar o podio.
Pola súa banda, José Moure apuntou que “este quinto campionato que celebramos xa na Pobra dá a recoñecer que tivemos un acerto no seu día de homologar o circuíto”.
Segundo fixeron saber, o dito circuíto habilitarase no tramo de fachada marítima comprendido entre a praza Alcalde Segundo Durán, onde se establece o lugar de saída e meta, e o peirao comercial.
A cita arrancará a partir das 10.00 horas e contará coa participación de aproximadamente 140 atletas que deberán completar o percorrido que lles corresponda segundo a modalidade.
Os tres primeiros atletas clasificados das categorías sub-10, sub-12, sub-14, sub-16, sub-18, sub-20, sub-23, absoluta e as diferentes modalidades máster recibirán unha medalla conmemorativa do campionato.
No transcurso deste evento contarase coa colaboración da Protección Civil pobrense e será de obrigado cumprimento en todo o momento o protocolo sanitario FISICOVID-DXTGALEGO.
