Boiro acollerá proxeccións das obras finalistas dos Premios Mestre Mateo

As catro deputacións galegas veñen de pórse a disposición da Academia Galega do Audiovisual para levar as novas creacións cinematográficas da nosa terra o máis preto posíbel da nosa casa. En concreto, as institucións provinciais comprometéronse formalmente a proxectar as cintas finalistas dos Premios Mestre Mateo nunha manchea de concellos. Na provincia da Coruña haberá sesións en Arteixo, Ames, Boiro, Carballo e Narón.

Na presentación da iniciativa na Deputación da Coruña interviron Xurxo Couto, deputado de Cultura e Ana Míguez, da xunta directiva da Academia Galega do Audiovisual.

O deputado de Cultura aproveitou para lembrar a política de apoio ao sector audiovisual por parte da institución provincial a través de diferentes liñas de axudas, como as axudas aos festivais audiovisuais, e de diferentes programas estábeis, como o programa Visións da Rede Cultural. Tamén fixo fincapé na colaboración “estábel” entre a Deputación e a Academia Galega do Audiovisual e asegurou que este ciclo “é un paso máis nesta colaboración que ten por obxectivo fundamental favorecer a difusión do audiovisual feito en Galicia, cunha promoción estable que chegue a novos públicos”.

Pola súa banda, Ana Míguez explicou que este ciclo nace para “potenciar o achegamento do cinema máis actual á cidadanía” e agradeceu a todas as administracións a súa implicación, tanto deputacións como concellos. Explicou que o Ciclo Mestre Mateo “está intimamente ligado aos premios que lle dan nome” e que o programa darase a coñecer cando se anuncien as finalistas da presente edición e as proxeccións empezarán despois da gala dos Mestre Mateo, o 19 de marzo. Celebrarase de xeito simultáneo en todas as localidades cunha periodicidade mensual, exceptuando os meses de xullo e agosto, e a entrada a estas será de balde. Toda a información sobre programación, horarios e salas estará dispoñíbel na web ciclomestremateo.gal.