Este luns 17 de xaneiro deu comezo no centro de recursos da Asociación Ambar a formación Operacións auxiliares de elaboración na industria alimentaria. A actividade, destinada a persoas con diversidade funcional menores de 30 anos, busca mellorar a súa empregabilidade e ten como obxectivos promover a sustentabilidade e a calidade no emprego e favorecer a mobilidade laboral, amais de reforzar as competencias profesionais da xente nova non ocupada e non integrada nos sistemas de educación e promoción.
A presentación foi encabezada por Milagros Rey, presidenta de Ambar; Ángeles Sampedro, técnica de emprego inclusivo de Ambar e coordinadora do proxecto; Daniel Tojo, orientador laboral de Ambar; e Inés Abad, docente da formación.
Esta formación, desenvolvida no centro que a asociación ten en Ribeira, é posíbel grazas ao financiamento da Fundación ONCE concedida na convocatoria Uno a Uno e enmárcase no Programa de Emprego Xuvenil do Fondo Social Europeo O FSE inviste no teu futuro.
Sobre a formación
Esta formación totalmente gratuíta está destinada a ocupación de persoal de almacén, carretilleiro ou carretilleira, auxiliares e operarios da industria alimentaria. Contará cunha fase teoría e outra práctica nun posto de traballo en empresa. Ademais inclúe unha bolsa de asistencia de 9 euros ao día na fase teórica e posibilidade de transporte adaptado.
