A Xunta apoia ao Mexillón de Galicia con preto de 150.000 euros

A conselleira do Mar, Rosa Quintana, e a presidenta do Consello Regulador da Denominación de Orixe Protexida (DOP) Mexillón de Galicia, Lina Solla, asinaron hoxe un convenio de colaboración no eido da promoción e mellora da comercialización do produto certificado co obxectivo de impulsar o seu recoñecemento por parte da cidadanía e favorecer o aumento tanto da demanda como dos prezos deste molusco.
Esta colaboración vai estar vixente ata o 30 de decembro deste ano e conta cunha aportación por parte da Xunta de Galicia de 149.000 euros, cofinanciada co Fondo Europeo Marítimo e de Pesca (FEMP), á que se engaden outros 149.000 euros aportados polo Consello Regulador. Con ese orzamento desenvolveranse distintas accións de promoción e difusión da calidade do mexillón de Galicia para favorecer a mellora do sector acuícola e das industrias relacionadas en materias como a comercialización, a promoción e o consumo de produtos certificados.
Entre as accións previstas inclúense actividades de promoción do mexillón en distintos eventos coa finalidade de dar a coñecer a variedade de formatos nos que se pode atopar (fresco, en conserva, cocido, conxelado ou pasteurizado, entre outros) e os beneficios que ten o seu consumo. Trátase de enxalzar o valor engadido deste produto, da máxima calidade, co obxectivo de que poida acadar mellores prezos no mercado xa que agora se sitúa nunha media inferior aos 0,5 euros o quilo.
Outras das actuacións incluídas na colaboración teñen como obxectivo robustecer o proceso de certificación da DOP Mexillón de Galicia con accións como a mellora do software que garante a rastrexabilidade dos produtos, as súas características e a súa certificación baixo o selo DOP Mexillón de Galicia. O obxectivo é poder apoiar a mellora dos niveis de produto certificado por parte desta entidade, xa que a media anual acada tan só o 15% do total do mexillón producido, caendo ata un 3% no caso do produto fresco, que é o de maior volume de vendas.
O convenio tamén atende á necesidade de promocionar o produto entre o conxunto da cidadanía e por iso recolle ademais actividades como degustacións nas prazas de abastos das cidades galegas, nalgúns eventos deportivos fóra da comunidade e en recintos deportivos ao aire libre. Ao mesmo tempo o Consello Regulador realizará distintas actuacións para dar a coñecer a entidade e difundir a súa imaxe -a través dos medios de comunicación e de accións de identidade corporativa- tanto entre o sector como entre o conxunto da sociedade para que sexa unha marca recoñecida e asociable directamente á produción de mexillón en Galicia.
Neste sentido, o convenio incide na importancia de difundir o labor do Consello Regulador e as garantías que ofrece a certificación da DOP tanto entre os consumidores como entre posibles compradores. De feito, na actualidade arredor do 40% do mexillón producido de Galicia -máis de 230.000 toneladas en 2020- ten como destino a industria transformadora de produtos do mar, mentres que o 60% restante se comercializa en fresco. Mentres, no caso da produción amparada polo selo da DOP Mexillón de Galicia, máis do 80% vai a parar ao sector transformador e o 20% restante comercialízase en fresco.
Este tipo de colaboracións contribúen a impulsar o sector e a mellorar a produción e os resultados dos produtores especialmente nun momento no que a actividade se ve condicionada en boa medida pola alerta sanitaria pola covid-19, como xa ocorreu nos dous anos anteriores. Por iso, o convenio pretende impulsar a promoción do mexillón certificado para que aumente a súa presenza nos mercados e acade mellores prezos.