O Concello de Pobra do Caramiñal vén de anunciar unha serie de incorporacións no programa festivo deste 5 de xaneiro, cambios motivados pola complexa situación sanitaria que estamos a vivir e que afectan directamente á visita dos Reis Magos ao termo municipal. O concelleiro da Seguridade, José Andrés Lojo (Nós Pobra); a súa homóloga do Turismo, Charo Varela (Nós Pobra); e a técnica municipal desta área, Sara Sánchez, foron as persoas encargadas de debullar información destas propostas que se desenvolverán de maneira “segura e controlada”. Por este motivo, permitirase ás nenas e nenos confinados ou sen posibilidade de desprazarse a posibilidade de falar coas Súas Maxestades.
Segundo fixo saber, a xornada do día 5 de xaneiro arrancará coas videochamadas que efectuarán Melchor, Gaspar e Baltasar. Como dixemos, estas comunicacións faranse só “a aquelas crianzas que se atopan confinadas como consecuencia da COVID-19” ou “para as cales resulta imposíbel achegarse á visita presencial”. Cada neno e nena deberá elixir con cal dos tres Reis Magos quere falar e é preciso inscribirse a través dun documento online específico. Estes encontros dixitais desenvolveranse en horario de 11.00 a 13.00 horas e, polo momento, hai 45 inscritos/as.
Posteriormente será a quenda do percorrido en vehículos por tódalas parroquias do termo municipal, coa saída programada para as 14.45 horas dende a zona da Corna e a chegada ás 18.00 horas á praza Alcalde Segundo Durán.
O itinerario previsto é o que segue: A Corna, O Maño, O Campiño, A Pontenaveira, A Mirandela, Xunqueiras, Venecia, O Camiño Ancho, A Tomada, Lesón, Os Vilares, As Pedriñas, Santa Cruz, Roupión, Rego, Tarrío, A Virxe do Monte, San Lázaro, A Crocha de Levante, A Crocha de Poñente, A Banda, A Ponte Barbanza, O Sanguilexo, Vilas, Santo Isidro, O Pumadiño, Os Casás, Ouxo, A Angustia, A Ribeiriña, A Lomba, San Lázaro, a rúa da Ponte e a praza Alcalde Segundo Durán.
Establécense distintos tramos con horarios orientativos: da Corna ao Campiño (de 14.45 a 15.15 horas); da Pontenaveira á Tomada (de 15.15 a 15.45 horas); de Lesón a Santa Cruz (de 15.45 a 16.15 horas); de Roupión a Tarrío (de 16.15 a 16.45 horas); da Virxe do Monte a Vilas (de 16.45 a 17.15 horas); e de Santo Isidro á praza Alcalde Segundo Durán (de 17.15 a 18.00 horas). Respecto a este formato, o edil da Seguridade fixo fincapé na importancia de evitar as xuntanzas con outros/as veciños/as e facer o seguimento dende as propias casas ou achegarse a un lugar seguro onde se poidan cumprir as medidas de seguridade. O referido itinerario tamén se pode consultar na Rede.
Tamén se poderá seguir por streaming a través do Facebook do Concello da Pobra do Caramiñal, así como coñecer o lugar no cal se atopan os Reis.
Máis tarde, a partir das 18.00 horas, recibirán os cativos e cativas na praza Alcalde Segundo Durán dun xeito “ordenado e seguro”. Para asistir é preciso rexistrarse previamente a través doutro formulario online (cuxo prazo está aberto dende a pasada semana). Así mesmo, ao longo dos días 3 e 4 de xaneiro habilítase o teléfono de contacto 981 843 280, marcando a extensión 2035 (dende as 10.00 ata as 14.00 horas). Unha vez formalizada a inscrición, deberase ir recoller a entrada física á propia oficina do turismo, situada na Casa Mariñeira (en horario de 10.00 a 14.00 e de 17.00 a 19.30 horas). Acádanse as 130 nenas e nenos anotados, polo de agora, para este formato.
Co obxectivo de evitar as aglomeracións, establécense 5 tramos horarios para a visita a Melchor, Gaspar e Baltasar, cunha fila de 30 crianzas por cada Rei Mago cada media hora. Outorgarase a hora á cal se debe asistir en función do Rei do Oriente que desexen visitar. Deberase acudir no momento que marque a cita, nin antes nin despois.
Ademais, contarase en distintos lugares da vila con actividades dinamizadoras móbiles.
En caso de meteoroloxía adversa, a recepción trasladarase ao CEP Salustiano Rey Eiras.
