Un raio provoca danos nunha vivenda de Rianxo sen causar feridos

Unha vivenda, da localidade de Rianxo, viuse afectada polo caída dun raio sobre o seu tellado, a pasada noite.

Os feitos ocorreron no lugar da Burata, parroquia de Taragoña, ao fío das nove e media. Nese momento, os axentes da Policía Local contactaron co 112 Galicia para informar do suceso, no que non había que lamentar danos persoais, e solicitar o apoio dos Bombeiros.

Deseguido, os xestores do Centro Integrado de Atención ás Emerxencias de Galicia (CIAE-112) déronlle o aviso aos Bombeiros de Boiro e aos membros de Protección Civil de Rianxo. Ademais, os datos tamén se puxeron en coñecemento da empresa subministradora da enerxía eléctrica.

Segundo os datos facilitados ao 112, pola dotación de Bombeiros desprazada, o raio caeu no teito da vivenda e chegou a entrar na mesma, véndose afectadas a instalación eléctrica e a fachada do domicilio. Por fortuna, a persoa que residía no lugar resultou ilesa.