Este mércores 29 de decembro a música en directo será a gran protagonista da axenda de Nadal en Boiro. O motivo, a celebración dunha sesión dupla (primeiro de novos talentos e logo de talentos consagrados) organizada polo Grupo de Voluntariado Turbina na Carpa Solidaria da Boqueira da Negral, na vila de Boiro. A cita dobre alongarase durante boa parte da xornada, comezando ás 16.00 cunha sesión de micro aberto para as novas promesas locais e chegando ao seu intre culminante sobre as 21.00 horas, cun concerto a cargo da banda boirense The Cuncas, formada por Juan Pérez Ortega, Manuel Sobral Figueroa, Elías Romero Tubío e Raúl Bonenfant Muñiz.
