“Pasividade e inoperancia da Xunta” – José Manuel Pena

Chama a atención que, desde as diferentes corporacións municipais, confrarías ou asociacións pesqueiras, se sitúen a favor ou en contra dun sector produtivo concreto segundo sexa o nivel de xeración de riqueza e de emprego no seu propio territorio. Estamos a falar da guerra aberta entre os percebeiros e os bateeiros, en Galicia.

A Xunta de Galicia, máis concretamente a Consellería do Mar, tería que realizar un chamamento á calma e abrir a mesa do diálogo para que ningún sector resulte prexudicado, chegando a un consenso. A pasividade e a inoperancia da Xunta non pode continuar por máis tempo se se quere evitar algún tipo de desgraza persoa entre os traballadores de ambos os sectores.

Tanto o mexillón como o percebe, de Galicia, son dúas especies importantes, cun valor gastronómico, social e económico contrastados, que nada teñen que envexar aos procedentes doutros países. Agora fai falta que todos poidan traballar, con tranquilidade, e cunha regulación específica que ocasione o menor dano posible a estes sectores extractivos.